Dienstag, 12. März 2013

Schulte Wuordelbuk un "Weltkultur"

Wat sind de Menschen doch verschieden
van Kopp un Faut un Posetur;
et giëtt op düëse Welt hienieden
niemols de glieke Kreatur.

Dä äine hiëtt twäi linke Hänne,
dä annere hiët Haore drin,
dä drüdde driëgget falsche Teähne,
im Koppe ower `n grauten Pinn.

Dä äine driëgget Bietellocken,
mäint wunners noch, wu scheun dat wör,
dä annere köft sik Siedensocken
un beld`t sick in, hä ställt` wat vüör.

In äinem ower sind se ennig
un laupet alle drächter heär:
wu wät me ohne Arbäit hennig
en dicken Toto-Milljonär.

Un uëse Wiewer stört all lange
met Stift un Farwe dä Natur,
se dreäget Köppe "van de Stange"
un schmachet füör ne Sportfigur.

Se scheämt sick nit, met Minirock
un "uowen ohne" rümtelaupen,
doch alls betahlen maut de Bock,
un allen "sexy" maut hä kaupen.

Betrachet nu dat graute Wunner
van "Einheitskopp" un "Weltkultur",
käm doch vam Baum de Ape runner,
dann wör en biëttken meähr Natur.

Keine Kommentare:

Kommentar veröffentlichen